SAJERONING SEPI

udan kawit awan
tambah sore tambah gemrujug  banyu udan
wengi  teka bareng hawa atis sing ngiris-iris perasaan
anak-anakku wis pada turu sebab kesel pit-pitan
bojoku wis pamit turu sebab kesel bali  sore mulang jam tambahan

sebab durung arip aku  plonga-plongo dewekan
ning ngarepe jendela kaca sing bureng
nerawang adoh ndeleng langit sing peteng
lungguh ning dhingklik
 ndadak  mati listrik  padhangan tek ganti ceplik
peteng kaya lagi aku cilik  pengin maca kudu mendelik
ning ati rasane kayong nylekit
hawa tambah adem nganti untu kudu gathik
karep turu tapi ati klasak-klisik
krasa banget siksane sepi  senajan  umahku  wis cilik

oh,jebul abot urip dewekan
senajan umahku wis emped-empedan ning perumahan
tetep bae krasa kesepian ora betah wong dewekan
clingak-clinguk  bingung lakon
ora ana kanca guyon

pancen  bener ngendikane wong pinter
sepi apa rame gumantung priwe  golih mikir
pas  ora ana batir lampune senthir krungune suara gasir
jan krasa banget nek urip kuwe jebule fakir
ora ning endi-endi menungsa tetep butuh wong liya
nggo kanca crita,kanca  gendu-gendu  rasa
sakabehing rasa, rasa bungah utawa rasa susah

sajeroning  sepi  ana sing kena nggo pelajaran
dadi kelingan  nek mangsane  wis tekan
ning njero kuburan kabeh  menungsa  mesthi dewekan
ora bisa sms-an apamaning fesbuk-an
ora ana hape ora ana sate
ora beda sugih apa kere
pejabat apa rakyat kaplinge pada ambane
ora peduli ning kene umahe cilik apa gede
jerone luang ya semana kae

sajeroning sepi ana pepemut
biasa numpak pesawat utawa sedan kinclong
nek wis mangsane  mlebu nge-rong ora bisa ketemu wong
pancen bener ora ana  wong sekti
sing bisa ngalahna sepi apamaning nolak mati
 sing sekti mung lemud karo semut  tegese nek di ge-sek  ma-ti

miturut kabar sing tek tampa
swasana ning kota kaya jakarta pancen madan beda
tata laire ningkana sepi ora ana
kuburan bae rame sing manggon nganti  sek-sekan
lan bisa omong-omongan(sebab wong esih urip manggoni kuburan)
wong mlaku pada rebutan dalan nganthi dengkul pada bethakan
kabeh nggon wis angel olih mbedakna bengi karo awan

senajan kota awan bengi rame  aja dikira sejatine rame
sebab ning desa utawa  kota ati menungsa ora beda
makhluk sepi tetep bae sok teka
manggon  ning njero ati  nyeseki dada
 marakna  nelangsa urip kayong ora ana guna
dina-dina rasane tambah dawa

senajan apa-apa ana,  duit akeh, mobil lan umah serba mewah
menungsa  tetep kenggonan  rasa ngresulah
ora bisa ucul sing perasaan sepi lan sengsara
wala wala kuwata
sajeroning sepi
ana pengerten sing perlu di cathet ning ati
wong urip ora patut kemaki lan aja nganti lali
sebab kabeh menungsa mesti arep mati